Sekretáriu Estadu Kooperativas Hala’o Enkontru ho Prezidente ASEAN Cooperative Organization (ACO)

Enkontru bilaterál refere sai oportunidade importante ba parte rua atu diskute kona-ba perspetiva no oportunidade kooperasaun entre Governu Timor-Leste, liuhusi Sekretaria Estadu Kooperativas (SECoop), ho ASEAN Cooperative Organization (ACO), partikularmente iha esforsu atu hametin dezenvolvimentu setór kooperativa iha Timor-Leste, no promove setór kooperativa nu’udar parte importante husi ajenda dezenvolvimentu ekonómiku iha rejiaun Sudeste Aziátiku.

ASEAN Cooperative Organization (ACO) mak organizasaun rejionál ida ne’ebé estabelese iha Dezembru 1977, ho objetivu atu halibur movimentu kooperativa sira iha rejiaun Sudeste Aziátiku, promove kooperasaun entre kooperativa, hametin kapasidade institusionál, dezenvolvimentu ekonómiku no prosperidade hamutuk. ACO mós sai nu’udar plataforma importante atu fasilita parseria rejionál, troka esperiénsia no promove interese movimentu kooperativa sira iha nasaun ASEAN.

Durante enkontru refere, Sekretáriu Estadu Kooperativas hato’o nia agradesimentu no apresiasaun ba ASEAN Cooperative Organization (ACO), partikularmente ba nia Prezidente, Datuk Seri Dr. Abdul Fattah Abdullah, tanba apoiu no kontribuisaun ne’ebé ACO kontinua fó ba SECoop, liuliu iha preparasaun no realizasaun Díli Regional Cooperative Conference and Ministerial Dialogue 2026 no ASEAN Cooperative Expo 2026, ne’ebé hala’o iha Díli.

Sekretáriu Estadu subliña katak ACO nia envolvimentu no apoiu iha eventu hirak-ne’e importante tebes atu hametin relasaun entre movimentu kooperativa Timor-Leste ho movimentu kooperativa sira iha nasaun membru ASEAN, no mós atu loke oportunidade foun ba dezenvolvimentu kooperativa iha futuru.

Iha oportunidade hanesan, Sekretáriu Estadu mós hato’o nia hakarak atu ACO kontinua fó asisténsia no fasilita ligasaun entre kooperativa sira iha Timor-Leste ho kooperativa sira iha rejiaun ASEAN. Kooperasaun refere espera bele fó oportunidade ba kooperativa Timor-Leste atu aprende husi esperiénsia, prátika di’ak no modelu dezenvolvimentu kooperativa ne’ebé implementa ona iha nasaun ASEAN sira, partikularmente iha área kapasidade institusionál, jestaun kooperativa, dezenvolvimentu negósiu no asesu ba merkadu rejionál.

Parte rua mós diskute kona-ba importánsia atu kontinua promove papel setór kooperativa iha dezenvolvimentu ekonómiku rejionál, liuliu iha kriasaun oportunidade ekonómika ba komunidade sira, dezenvolvimentu ekonómiku inkluzivu no hametin kooperasaun entre movimentu kooperativa iha Sudeste Aziátiku.

Iha sorin seluk, Prezidente ASEAN Cooperative Organization (ACO), Datuk Seri Dr. Abdul Fattah Abdullah, hato’o nia agradesimentu ba Governu Timor-Leste, partikularmente ba Sekretaria Estadu Kooperativas, tanba konvite no hospitalidade di’ak ne’ebé oferese ba delegasaun ACO durante sira-nia vizita iha Díli.

Nia mós manifesta ACO nia prontidaun atu kontinua kolabora ho SECoop iha dezenvolvimentu setór kooperativa iha Timor-Leste, inklui esplora oportunidade kooperasaun foun no posibilidade atu fó continuidade ba iniciativa Díli Regional Cooperative Conference iha futuru, nu’udar plataforma rejionál ba diálogu, aprendizajen no hametin parseria entre movimentu kooperativa sira.

Enkontru bilaterál ne’e reafirma komitmentu parte rua atu hametin relasaun no kooperasaun institusionál entre SECoop no ACO, no sai mós pasu importante atu promove integrasaun movimentu kooperativa Timor-Leste iha rede kooperativa rejionál, hodi kontribui ba dezenvolvimentu ekonómiku inkluzivu, sustentável no prosperidade hamutuk iha rejiaun.

Entretantu, Díli Regional Cooperative Conference 2026, ne’ebé realiza iha loron 2–3 Outubru 2026, iha Palm Spring Hotel, Díli, Timor-Leste, ho tema “Empowering Communities, Connecting Nations”, sai nu’udar plataforma rejionál importante ida ne’ebé halibur governante, reprezentante movimentu kooperativa, peritu, akademiku no parseiru dezenvolvimentu sira husi Timor-Leste no nasaun membru ASEAN. Eventu hirak-ne’e ho objetivu atu promove diálogu, troka esperiénsia, hametin rede kooperasaun no esplora oportunidade parseria entre kooperativa sira iha rejiaun, hodi kontribui ba dezenvolvimentu ekonómiku inkluzivu, kriasaun oportunidade empregu no hadi’a moris komunidade sira, liuliu iha nivel baze.