DRCCMD 2026
Adjuntu Sekretáriu-Jerál ASEAN Promete Fó Asisténsia Ba SECoop
Adjuntu Sekretáriu-Jerál ASEAN, Sr. Satvinder Singh enkoraja SECoop atu prepara proposta konkretu sira ne’ebé relasiona ho prioridade no programa dezenvolvimentu kooperativa, hodi bele esplora oportunidade apoiu liuhusi mekanizmu Initiative for ASEAN Integration (IAI).
Díli, 2 Outubru 2026 – Sekretáriu Estadu Kooperativas, Eng. Arsénio Pereira da Silva, hala’o enkontru bilaterál ho Adjuntu Sekretáriu-Jerál ASEAN ba Komunidade Ekonómika ASEAN (AEC), Sr. Satvinder Singh, iha marjen Díli Regional Cooperative Conference and Ministerial Dialogue 2026, ne’ebé realiza iha Palm Spring Hotel, Díli, Timor-Leste.
Enkontru bilaterál refere sai oportunidade importante atu diskute oportunidade kooperasaun entre Timor-Leste no Sekretariadu ASEAN, partikularmente iha área dezenvolvimentu kooperativa, integrasaun ekonómika rejionál no hametin kapasidade institusionál setór kooperativa iha Timor-Leste.
Iha enkontru refere, Sekretáriu Estadu Kooperativas hato’o nia agradesimentu ba Adjuntu Sekretáriu-Jerál ASEAN ne’ebé disponibiliza nia tempu atu marka prezensa no fó kontribuisaun hanesan oradór iha Sesaun Espesiál ho tema “Advancing Timor-Leste’s ASEAN Economic Integration: Sectoral Pathways Forward.”
Sekretáriu Estadu subliña katak prezensa Adjuntu Sekretáriu-Jerál ASEAN iha konferénsia refere importante tebes, liuliu hodi partilla hanoin, esperiénsia no perspetiva estratéjika kona-ba Timor-Leste nia prosesu integrasaun ekonómika iha ASEAN, inklui oportunidade no dezafiu sira iha setór ekonómiku oioin.
Iha oportunidade hanesan, Sekretáriu Estadu mós hato’o pedidu ba Sekretariadu ASEAN atu kontinua fó apoiu tékniku no institusionál ba Timor-Leste, partikularmente iha área dezenvolvimentu kooperativa, hodi asegura katak setór ne’e bele kontribui diretamente ba dezenvolvimentu ekonómiku inkluzivu, kriasaun oportunidade empregu no hadi’a moris komunidade sira iha nivel baze.
Iha sorin seluk, Adjuntu Sekretáriu-Jerál ASEAN, Sr. Satvinder Singh, hato’o nia apresiasaun ba konvite husi Governu Timor-Leste, liuhusi Sekretaria Estadu Kooperativas, no agradese ba hospitalidade no akollimentu di’ak ne’ebé SECoop no ekipa organizadora oferese durante nia vizita iha Díli.
Nia mós reafirma Sekretariadu ASEAN nia disponibilidade atu servisu hamutuk ho SECoop, liuliu hodi identifika oportunidade kooperasaun no asisténsia téknika ne’ebé bele responde ba nesesidade dezenvolvimentu setór kooperativa iha Timor-Leste.
Iha kontestu ne’e, Sr. Satvinder Singh enkoraja SECoop atu prepara proposta konkretu sira ne’ebé relasiona ho prioridade no programa dezenvolvimentu kooperativa, hodi bele esplora oportunidade apoiu liuhusi mekanizmu Initiative for ASEAN Integration (IAI). Proposta hirak-ne’e sei permite Sekretariadu ASEAN atu avalia no identifika posibilidade asisténsia ne’ebé apropriada, tuir mekanizmu kooperasaun rejionál ne’ebé eziste.
Aleinde ne’e, Adjuntu Sekretáriu-Jerál mós enkoraja SECoop atu fó atensaun espesiál ba sustentabilidade iha dezenvolvimentu setór kooperativa, no haree posibilidade atu promove área ne’e hanesan prioridade estratéjika bainhira Timor-Leste asume responsabilidade nu’udar anfitriaun ba enkontru ASEAN sira iha futuru.
Enkontru bilaterál ne’e reflete komitmentu parte rua atu kontinua hametin diálogu, koordenasaun no kooperasaun, hodi asegura katak prosesu integrasaun Timor-Leste iha ASEAN bele lori benefísiu konkretu ba setór kooperativa no komunidade sira, no kontribui ba dezenvolvimentu ekonómiku ne’ebé inkluzivu no sustentável.